العلاقة بين قص الشعر و المشاعر

عشوائية المشاعر .. عشوائية الحب ... حاجة كدة متلخبطة عاملة زى اللى بيشرب كوكتيل ...
إنت مش قادر تحدد إنت صح ؟؟ و لا غلط ؟؟ و لا متنيل على عين اللى جابوك ...السمة الوحيدة المشتركة ..إنك متدهول يا جميل ..
و أى دهولة دى مع سبق الإصرار و الترصد ..و لا ينفع تدفع كفالة و تخرج ..و لا محامى يضرب حرز القضية و يطلعك براءة ..زيك كدة زى الحزب الوطني ..قاعد و متبت ..و متربع و اللى مش عاجبوة ..مش هنقول يعمل إية ما علينا نرجع لموضوع المشاعر ..
عندى إختراع ..عبقري أحسن من إختراع الموبايل ...
لما الدنيا تسود قوى ..و المشاعر تتنيل ..و تبقى مرهق و متنهنه من كتر التفكير ..و دماغك و قلبك عاملين عليك مؤامرة ..
نصيحة ..روح قص شعرك ..
من غير ضحك ..و النعمة دى على عنية بينفع ..لازم تخفف الضغط من على دماغك لتنفجر و الحل الوحيد تحلق ..
صدقونى مهو النصائح المعلبة بتاعتة الصحاب ..لا تثمن و لا تغنى من جوع ..متفكريش فية ..اللى باعك بيعة ..طز دنتى زى القمر و ميت واحد يتمناكى (و طبعآ مفيش واحد من المية دول بيظهر مهو إحنا بنرضى بلغلب لية بس ؟؟)
علشان كدة الحل المثالى تخفها من على الجمجمة ..تبقى زيدان ..تبقى أبو تريكة أمر الله بقى و نفذ ..و تلك هى أولى نظرياتى العبقرية ..